Sinabi ni Pangulong Aquino Linggo ng gabi na mabilis na makakaahon ang bansa sa trahedya ng pambibihag noong Agosto 23 kung saan walong turistang mula sa Hong Kong ang namatay at nagbunga ng pagkondena sa kapabayaan ng pamahalaan.

“Sandali na lang yan eh malalaktawan na ho natin, talagang tinuturo tayo na mas buo doon sa daan na tuwid,” ani G. Aquino sa talumpati niya sa burol ng dating alkalde ng Olongapo City na si Teodoro Macapagal, isang matagal nang tagasuporta ng pamilya ng Pangulo.

“Yung mga problema ho natin sa kasalukuyan baka dalawa, tatlong taon masasabi nating, matatawa na lang tayo pag naalala natin ‘di pala ganun kabigat,'' sabi ng Pangulo.

Pero hiningi ng Punong Ehekutibo ang tulong ng lahat upang malagpasan ng bansa ang krisis at matulungan ito sa pag-unlad.

Nanawagan din siya sa mga mamamayan na magdasal dahil naniniwala siya na may magandang plano ang Diyos para sa Pilipinas.

Matinding pagbatikos ang inabot ng pamahalaan at ng mga Pilipino bunga ng pumalpak na pagliligtas sa mga bihag na napanood sa buong mundo.