Daan-daang mambabasa ng Inquirer at Inquirer.net ang nagpadala ng tanong gamit ang Internet upang sagutin ng mga kandidatong dadalo ngayon sa “Inquirer 1st Edition: The Presidential Debate”

May ilang tanong na nagpapahiwatig ng paninindigan ng nagtatanong na nag-logon sa Inquirer website at sumagot sa isang online form.

Masasabi na ilan sa mga nagtanong ay galit o tuwirang kaaway ng isa o ilang kandidato. Nakararami ang magalang at hindi kakikitaan ng bias.

Marami sa mga tanong ay para sa lahat ng kandidato, pero ang malaking bilang ay para kay Benigno “Noynoy” Aquino III, Manuel “Manny” Villar at Gilbert “Gibo” Teodoro. May ilan na para kay Joseph Estrada.

Tiniyak na nina Aquino, Villar at Teodoro na darating sila. Nagpasabi na rin sina JC de los Reyes, Sen. Richard Gordon, Sen. Ana Consuelo Madrigal, Nicanor Perlas at Bro. Eddie Villanueva na sila ay dadalo.

Sa daan-daang tanong, 18 ang pipiliin at ibabato ng siyam na panelistang binubuo ng mga kolumnista, editor at manunulat ng Inquirer.

May kabuuang 81 tanong sa debate o tig-siyam sa bawat kandidato.

Namigay ng 2,000 tiket para sa unang presidential debate na binuo ng Inquirer at gaganapin sa UP Theater.